La Rabia y los Suaños
Jun 9th, 2009 by CSOA La ReFLEXon
Les circunstancies fixeron que tuviera que vivir mirándovos constantemente a los güeyos,
ser el blancu de les sensaciones que remacen de les vuestres pupiles.
Ello faime decatame del mal que vos come per dientru,
d’esa enfermedá curable na que vivís de contino.
Y surde en min un rasgu d’humanidá
que llega a faceme esmolecer
pola vuestra tristura.Y llanzo al aire una alvertencia. Tresparente, sincera, sin mayor intención.
D’humanu a humanu, daivos cuenta: sois capaces de finar un suañu por una firma nún papel, reducir la vida al tiempu que pasáis temerosos vixilando la vuestra llende, garraos a los vuestros recuerdos tanxibles o apropiándovos de lo inmaterial. ¡Vos!, que mos ficísteis esconsoñar d’esti suañu, desagospiando la fábrica de suaños pa baltiar l’idega n’escombru y desaniciar la vida que flota nel aire tornándola en peste, en noxu, n’inaición. Obligando a los vuestros a vivir na inanición dafechu. Darréu, otra vuelta sabréis autorrecompensavos. Xirar sobre vosotros y saber masturbavos al ver que la xusticia de la llei se sobrepón.
Y nós, probinos. Otra vez a volver a equivocamos, a esguilar poles les vuestres llendes y muries y volver a topamos con esi desaniciu nel que finca la vuestra llei. Sabréis entos miramos arremellaos, tomar xeitu paternu y facer que reñamos mientres debuxáis de nuevu la llinea que trazásteis mal día ente’l bien ya’l mal. Quiciás teis no cierto, pero ye muncho más sabrosa esta mentira que me fai más real la mio vida.
Namás quiero, anque namás seya per un momentu robáu a un parpaguiar, poder facevos sentir lo que siente la piel cuando ta en caldia; cuando la mente ta enceso y hasta’l mieu s’espanta. Cuando s’arramen sorrises, nervios, señaldá. Esa victoria de sentise un dueñu del so propiu presente, d’engañase y creyer que por querer yá puedes, de vivir y ser llibre mientres llees nes parés que’l futuru ye un cuadru sobre’l que garabatiar.
Deprender, qu’esta mierda de vida dacuandu apurremos xugu. Nel que podemos bañamos, del que podemos beber nel que podemos morrer faciendo alcordanza d’un instante. Y entrugase ¿qué más da si me equivoco? si sé conformame con facer de cada minutu un cuentu de fades nel que nun importa que haya un final. Que lu hai, pero la meta ye güei y non mañana.
Sigo tendiendo la mano y sé que daquién me la cortará si la sigo estirando. Que responderé a la hostia y voi siguir alendando (o non) porque lo que llate ye la mio presencia entá más que’l mio propiu corazón.
Echo cuentes, y sé que calcular nun ye la mio virtú más cercano y por munches perres que xorrezan d’essi perru ensin amu, d’esi escombru al que un día vos quixisteis agarrar…y decíme ¿cuantu tiempu produciendo tendréis que alienalo? ¿cuantos años de euros podrán llegar a algamar tolo que en vida, sensaciones ellí fui yo quien a ganar? Creo que eones, tiempu que nun veréis nin en presente nin en pasáu, tantu que nun sedréis quien nin siquiera a imaxinalo mientres yo guardo los mios frutos que guañaron de segundos semaos de llibertá.
Dedicáu a la peña que fizo posible too esti tiempu la ReFLEXón (la lliteralidá) y a la que durante este llinies sintiu, a lo menos, un principiu d’empatía (la metáfora).
Gracies y seguíi suañando anque el marcu lu pinte mañana otres parés.
Llarga vida a la fábrica de suaños
De Nenyure, allí con traducción al castellano. Y están sonando Belleza y Estafa, de Karoshi.
