El diariu de FLEXtricia

329. Ésti ye’l númberu de díes que les lleis qu’amparen la propiedá privada penriba de cualquier otru drechu nos permitieron llevar a cabu’l nuesu proyeutu reFLEXivu y antiespeculativu. Foi un suañu fechu realidá nuna antigua fábrica de colchones que llega al so final nesti espaciu por mor d’un autu xudicial sofitáu nesi sacrusantu drechu a la propiedá privada y nunes identificaciones policiales arbitraries a persones que yeren meres usuaries d’un espaciu que llevaba más de diez años abandonáu, d’un espaciu que, enantes de la entrada de les moces y mozos que-y dieron vida, nun yera más qu’una montonera d’escombros, suciedá, goteres y rates.

Esti inmensu espaciu foi recuperáu, rehabilitáu y lliberáu pal so usu públicu, foi abiertu pa tol barriu, pa toles persones que quisieren facer cualquier actividá n’elli. Y munches fueron les actividaes sociales, formatives o lúdiques que s’entamaron nesti centru social: charres, conciertos, recitales de poesía, representaciones teatrales, proyeiciones, comedores o cenadores populares, clases de llingua asturiana, d’inglés, de castellán a persones inmigrantes, talleres de consumu responsable, de confección de llámpares de papel. Nel centru había una biblioteca, un archivu con materiales del movimientu obreru n’Asturies, un circuitu pa patinar, una amplia zona de gratuidá onde la xente podía coyer llibremente y de baldre cualquier cosa que necesitara… Y too esto dende l’autoxestión, ensin pidir nin mendigar un euro a denguna instancia pública y aprovechando meyor que nadie los pocos recursos disponibles.

Col desaloxu previstu, toa esta triba d’actividaes desapaez, muerre, como morrerá tamién un espaciu que volverá ser esi edificiu de más de once mil metros cuadraos abandonáu a la so suerte.

Magar d’esti desaloxu, magar d’otros reveses que recibimos en feches caberes, en especial los ataques y estrozos sofríos pela parte de persones vinculaes a la ultraderecha, nós declarámonos arguyoses con esti proyeutu que nun va finar equí. El tiempo danos y siguirá dándonos la razón, y amosará que, escontra la especulación urbanística (que ta llevando a los tribunales a cantidá de cargos electos y gobiernos municipales enteros), la meyor forma de llucha ye’l compromisu, l’autoxestión y la ocupación. Ensin ánimu de paecer grandilocuentes, camentamos que la nuesa llucha ye xusta y abrirá un camín inevitable ante tanta construcción desenfrenada, ante tantos intereses especulativos; un camín asemeyáu al que nel so día recorrieren otros coleutivos criminalizaos como’l de les sufraxistes, o más recién los movimientos pola insumisión o pol albuertu.

Podrán desaloxar la ReFLEXón , podrán multanos y encarcelanos, pero’l movimientu pola ocupación, pol usu d’inmuebles abandonaos va continuar nel futuru. Escontra la especulación, la explotación llaboral y económica, volveremos ocupar y sedremos más. Anunciámoslo públicamente y a los cuatru vientos: güei desalóxannos d’equí, faen morrer un llugar, pero el CSOA La ReFlexón siguirá por siempres. Dando vida, sintiéndonos vivos, creando, construyendo utopías dende los escombros. Nos echen pero nun nos vamos.

Como muestra de que’l CSOA La ReFLEXón sigue más vivu que nunca, y con motivu d’una fecha tan señalada pa nós como ye’l 11 de Xunetu, día del primer aniversariu del proyectu, esti prósimu sábadu convocamos una manifestación que percorrerá’l centru de Xixón, y na cual distribuiremos esti comunicáu, sofitáu por una montonera de colectivos sociales, antirrepresivos, culturales y de toa triba na ciudá de Xixón y de toa Asturies. Esperamos cuntar cola vuesa presencia pa demostra-yos a toos y toes que La ReFLEXón
pervive y bien ceo pasará a l’Aición.

¡Puxa La ReFLEXón!

Sofiten:

C.S Sestaferia, COSAL-Xixón, FUSOA, Cambalache, CSI, Acsur, Alambique, Picu Rabicu, L’Arcu la vieya, Plataforma contra los Agrocombustibles, Ateneo Obrero, Aula Popular “José Luis García Rúa”, Sociedad Cultural Gijonesa, A Pie de Barrio (ApB), Fnast.net, Ensame Cultural Sonastur, Glayíu, Diagonal-Asturies, A.C El Contubernio, Lliberación, COSAL-Uviéu, Ingienería Sin Fronteras, Les Otres Cares del Planeta, Radio Kras, Escanda, Infoasturies, Asociación Cultural Mecigayu Ska, Sofitu.

Axentes culturales:
La Tarrancha, K-Nalón, Falanoncaduca, Adizión Etilika, Las Marakas de Machín, Xabel Vegas, Dixebra, Montañas, Fe de Ratas, Gomeru, Escuela de Odio, Caso Omiso, Arrabuñazo, Skontra, Vinagre de Sidra, Skama la Rede, Habeas Corpus, DEEPS, Sin Enchufe, Sambre, Herbamora, Minoría Agresiva, Chalaneru Sound, Yasta Fait, Galán, Fasenuova, La Charanga’l Ventolín, La Vereda Teatro, Xunca Records, Toli Morilla.

Contautu y más información:
flextricia@gmail.com
www.flextricia.net